İqtisadiyyat

Azərbaycanda torpaqlardan istifadədə uyğunsuzluqlar yaxın beş aya aradan qaldırılacaq

Azərbaycanda torpaqlardan istifadədə mövcud uyğunsuzluqların aradan qaldırılması yaxın beş ay ərzində başa çatdırılacaq.
İqtisadiyyat Nazirliyindən “APA-Economics”ə verilıən məlumata görə, Əmlak Məsələləri Dövlət Xidməti tərəfindən torpaqların elektron kadastr uçotu işi ölkə ərazisində 51 rayon üzrə yekunlaşıb. 51 rayondan 47-də pay torpaqlarında uyğunsuzluqlarla bağlı fərqlərin aradan qaldırılması işlərinin icrasına başlanılıb.
47 rayondan 10-da (Ağsu, Qobustan, Hacıqabul, Salyan, Kürdəmir, Ucar, Ağcabədi, Ağdaş, Ağdam və Şamaxı rayonlarında) dürüstləşdirmə işləri yekunlaşdırılaraq nəticələr Torpaqların Elektron Kadastr Uçotu İnformasiya Sisteminə inteqrasiya edilib.
Görülən işlər zamanı ilk növbədə sənədlərdəki məkan göstəriciləri ilə istifadədə olan faktiki göstəriciləri uyğun olmayan pay torpaqları dəqiqləşdirilir. Pay torpaqları ilə bağlı qarşıya çıxan problemlər torpağın yerləşdiyi ərazidə araşdırılaraq uyğunsuzluqlar aradan qaldırılır. Ərazi vahidi üzrə layihələr hazırlanıb kağız variantda müvafiq icra nümayəndəliyi və bələdiyyələrlə razılaşdırılır. Sonda dürüstləşdirilmiş məlumatlar Torpaqların Elektron Kadastr Uçotu İnformasiya Sisteminə inteqrasiya edilir.
17 rayonda islahat zamanı ayrılan pay torpaq sahələrinin sənədlərdəki məkan göstəricisi ilə faktiki istifadə göstəriciləri arasında fərq olan ərazilərin mülkiyyətçilərinin siyahısı dəqiqləşdirilərək onlardan yeni sənədlərin hazırlanması üçün dürüstləşmə işlərinin aparılmasına razılıq alınıb. 12 rayonda çöl-ölçmə işləri tamamlanıb, hazırda kameral işlər aparılır. 8 rayonda isə çöl-ölçmə işləri davam etdirilir.
Vətəndaşların torpaq sənədlərindəki məlumatlarla faktiki vəziyyət arasındakı uyğunsuzluqlar çoxsaylı torpaq mübahisələrinə və qeydiyyat məsələlərində problemlərə səbəb olurdu. Bu işlər çərçivəsində torpaq islahatı ilə əlaqədar vətəndaşların mülkiyyətinə verilmiş pay torpaqlarına dair hüquqmüəyyənedici sənədlərdəki ölçülərlə faktiki ölçülər arasındakı fərqlərin tənzimlənməsi üçün normativ-hüquqi baza yaradılır. Bununla vətəndaşlar pay torpaqlarına dair hüquqi sənədləri Xidmətin ərazi ofislərinə təqdim edərək çıxarışları rahatlıqla əldə edə biləcəklər.
Qeyd edək ki, torpaqların elektron kadastr uçotunun qurulması və rəqəmsal xəritələrin hazırlanması işləri çərçivəsində pay torpaqlarının koordinatları, yerləşmə vəziyyəti, kadastr planı, o cümlədən hər bir mülkiyyətçiyə məxsus olan ərazinin sahəsi dəqiqləşir.

APA

Bənzər yazılar

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button