Cəmiyyət

COP26 – hər kəs üçün daha parlaq gələcəyin təminatı

BMT Günü tədbirində COP26 və iqlim dəyişikliyi ilə bağlı fəaliyyətlər müzakirə olunub.
“Paris Sazişinin hədəflərinə çatmaq üçün daha iddialı vədlərə və qətiyyətli addımlara ehtiyacımız var,” BMT-nin Azərbaycandakı rezident əlaqələndiricisi Vladanka Andreeva BMT Günü və Qlazqoda keçiriləcək BMT-nin İqlim Dəyişikliyi Konfransına (COP26) həsr olunmuş tədbirdə bəyan edib.

İstiqlal.az xəbər verir ki, xanım Andreeva emissiya balansını sıfıra aparan yolu təşviq edən 2030-cu il hədəflərinə çatmaq üçün ölkələrin milli səviyyədə müəyyən edilmiş daha böyük və iddialı töhfələr verməli olduğunu vurğulayıb.
Tədbirin açılış mərasimində Ekologiya və Təbii Sərvətlər nazirinin müavini Rauf Hacıyev, Böyük Britaniya və Şimali İrlandiya Birləşmiş Krallığının Azərbaycandakı səfiri Ceyms Şarp və Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov çıxış edərək, etimadın bərpa etmək, fəaliyyətlərin gücləndirmək və Paris Sazişində verilən vədləri tam şəkildə yerinə yetirmək üçün qlobal tərəfdaşlığın vacib olduğunu qeyd ediblər.
“COP26 – hər kəs üçün daha parlaq gələcəyin təminatı” adlı tədbir dövlət qurumları, diplomatik missiyalar, özəl sektor, vətəndaş cəmiyyəti və mediadan 80-ə yaxın iştirakçını bir araya gətirib. Onlar iqlim dəyişikliyi ilə mübarizədə hökumət, vətəndaş cəmiyyəti və özəl sektorun rolunu müzakirə ediblər. İştirakçılar, bir çox ölkənin pandemiyadan zərər çəkmiş iqtisadiyyatlarını yenidən qurduğu bir vaxt “yaşıl bərpa” yollarına dair fikir mübadiləsi aparıblar.
Açılış sessiyasının ardınca hökumət, vətəndaş cəmiyyəti və özəl sektor mütəxəssislərinin, həmçinin İtaliyanın Milan şəhərində COP26 öncəsi konfransa qatılmış Azərbaycanlı gənc fəalın iştirakı ilə panel müzakirələri keçirilib. Onlar COP26-nın dörd məqsədinə nail olmaq yollarına dair fikir mübadiləsi aparıblar. COP26-nın məqsədləri aşağıdakı kimidir: 2050-ci ilədək emissiya balansını sıfıra endirmək və qlobal istiləşməni 1.5 dərəcə ətrafında saxlamaq; icmaları və təbii yaşayış yerlərini qorumaq; maliyyə resurslarının səfərbər etmək; və məqsədlərə çatmaq üçün birgə fəaliyyət göstərmək.

Bənzər yazılar

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button